Si një ndër institucionet kryesore në luftën kundër korrupsionit, Inspektorati i Lartë, e vlerëson maksimalisht transparencën me opinionin dhe bashkëpunimin me median e organizmat publikë e joqeveritare.
Në faqen tonë zyrtare të internetit gjendet informacioni i plotë mbi funksionimin e Inspektoratit të Lartë, aktet ligjore dhe nënligjore mbi të cilin realizohet hetimi administrativ, subjektet deklarues, si edhe statistika mbi rezultatet e aktivitetit institucional.

Në ndihmë të subjekteve deklarues gjendet një guidë e detajuar për mënyrën e plotësimit të deklaratës së interesave private. Po ashtu, në këtë faqe është prezantuar informacion i plotë i mënyrave të shmangies së konfliktit të interesave, i cili u shërben të gjithë zyrtarëve të administratës publike që janë pjesë e një vendimmarrjeje.
Inspektorati i Lartë i Deklarimit dhe Kontrollit të Pasurive shpreh bindjen se, nëpërmjet bashkëpunimit të të gjithë faktorëve publikë, si edhe prezantimit të transparencës në nivele maksimale, do të jemi të aftë të realizojmë qëllimin tonë të përbashkët; forcimin e shtetit ligjor në Shqipëri.